လူ​ကြိုက်​မ​များ​သော အမူအကျင့်​များ​

လူ​ကြိုက်​မ​များ​သော အမူအကျင့်​များ​ကို ရှောင်​ရန်

ကျွန်ုပ်​တို့​သည် ကျွန်ုပ်​တို့​၏ စား​ဝတ်နေ​ရေး​အတွက် နေ့​တ​ဒူ​ဝ လှုပ်ရှား​သွား​လာ​လုပ်ကိုင် ဆောင်ရွက်​ကြ​ရာ​မှ ကျွန်ုပ်​တို့​၏​အပြုအမူ​အချို့​ကြောင့် တ​စ​တ​စ​မိတ်​ရှားပါး​မှု​များ၊ တ​စ​တ​စ​လူ​မုန်း​များ​လာ​မှု​များ​ကို တွေ့​လာ​ရတတ်​၏။ ဤ​သည်​ကို နုနယ်​စဉ်​အချိန်​က မ​ပြုပြင်​လျှင် ကြာ​သော် ဆိုးရွား​လာ​တတ်​၏။

အ​ဆို​ပါ​လူ​ကြိုက်​မ​များ​သော အပြုအမူ (ဝါ) မိတ်​ရှားပါး​စေသော အမူအကျင့်​များ​မှာ အောက်​ပါ​အတိုင်း​ဖြစ်​သည်။

​၁) ခေါင်းမာ​ခြင်း ( Personality Rigidity )

ကျွန်ုပ်​တို့​သည် ကျွန်ုပ်​တို့​နှင့် ဆက်ဆံ​သူ​တိုင်း ခေါင်းမာ​လျှင် သိပ်​မနှစ်​သက်​ချင်​ကြ၊ လုပ်​ငန်း​ဆောင်​တာ​တွင်​၎င်း၊ ပြောဆို​ဆွေးနွေး​ရာ​တွင်​၎င်း၊ တခြား​သူ​၏​တင်ပြ ဆွေးနွေး​ချက်​ကို လက်မ​ခံ၊ တခြား​သူ​က တောင်းပန်​မေတ္တာရပ်ခံ​သည်​ကို ဂရု​မ​ပြု မိမိ​ပြော​သည်​မှ​အမှန်၊ မိမိ​လုပ်​ချင်​သည်​မှ​အမှန်၊ မိမိ​သဘော​နှင့်​မ​တွေ့​လျှင် လက်မ​ခံ အစ​ရှိ​သည့် သဘောထား ကျဉ်းမြောင်း​သူ၊ ဆက်ဆံ​ပေါင်းသင်း​ရ ကပ်​သပ်​သူ​များ​ကို မည်​သူ​မျှ မနှစ်​ခြိုက်​ကြ။

ဤ​ကဲ့သို့ ခေါင်းမာ​သော​သူ​များ​မှာ နိုင်ငံ​ရေး အယူဝါဒ​အစွန်း​လွတ်​ယုံကြည်​နေ​သူ​များ၊ ဘာသာ​ရေး အယူ​သည်း​သူ​များ၊ သဘောထား​ကျဉ်းမြောင်း​သူ​များ၊ ပညာ​ဂုဏ်​နှင့် ဓန​ဂုဏ်မောက်​သူ​များ​၌ အ​ထူး​တ​လည်​ကြုံတွေ့​ရတတ်​၏။ တ​ခါ​တ​ရံ​တွင်​မူ စာပေ​ပညာ​ကို မ​တောက်​တ​ခေါက် မ​ပြည့်​မ​စုံ လိုက်စား​သူ​များ​၌​ပါ မိမိ​တတ်​သည်​ကို တ​ဆိပ်​တ​အိတ်​ထင်​ပြီး ကိုယ့်ကိုယ်ကို အထင်ကြီး​ဘဝင်​မြင့်​ခါ သူ​များ​ပြော​သည်​ကို လက်မ​ခံ​ဘဲ ခေါင်းမာ ဘဝင်​မြင့် တတ်​ကြ​ပြန်​သည်။

​၂) မိမိ​ဘက်​က အကာအကွယ်​ယူ​မှု​များ​လွန်း​ခြင်း( The Chip-on-the-shoulder Crank )

ဤ​အမျိုး​အစား​တွင် ပါဝင်​သော​သူ​များ​သည် လုပ်​ငန်း​ဆောင်​တာ​နှင့် ပတ်သက်​၍ ဆက်ဆံ​ပြောဆို​လုပ်ကိုင်​ရာ​တွင် တ​ပါး​သူ​ကို မ​ဆို​ထား​နှင့် ရင်းနှီး​ခင်မင်​သော သူငယ်ချင်း​ဖြစ်​သူ​ကို​ပင် အ​ယုံ​အ​ကြည်​ကင်း​မဲ့​တတ်​သည်။ သံသယ​ဝင်​တတ်​သည်။ ယင်းသို့ အ​ယုံ​အ​ကြည်​ကင်း​မဲ့​သည့်​စိတ်​နှင့် ဆက်ဆံ​မှု​ကြောင့် မိမိ​၌​လည်း စိတ်​ဆင်းရဲ တ​ပါး​သူ​တွင်​လည်း စိတ်​လွတ်လပ်​မှု​မ​ရှိ။

တ​ဖန် မိမိ​ကိုယ်တိုင်​လည်း တ​ပါး​သူ​အား မ​ယုံ​မ​ကြည်​နှင့် လုပ်​ငန်း​ဆက်ဆံ​ရ​ခြင်း​ကြောင့် စိတ်​မ​ကျေ​မန​ပ်​ဖြစ်၊ သို့​ဖြစ်​ရာ​မှ စိတ်တို​လာ​ကာ စကား​တစ်​ခွန်း အဆင်​မ​ပြေ​ရုံ​နှင့် စိတ်ဆိုး​လျှင် ထ​ဆိုး​ပြီး စကား​များ​ခိုက်ရန်​ဖြစ်​ပွါး အစ​ရှိ​သည့် စိတ်​ပြောင်းလဲ​မှု​များ စိတ်​လှုပ်ရှား​မှု​များ ဖြစ်​ပေါ်လာ​စေ​သ​ဖြင့် လူ​တိုင်း​ကို မ​ယုံ​မ​ကြည် သံသယ​ဝင်​စိတ်​မ​ထား​ပါ​နှင့်..

​၃) ကိုယ်ကျိုး​ကြည့်​လွန်း​ခြင်း( Self Centeredness )

ဤ​ပုံစံ​တွင်​ပါဝင်​သော​သူ​များ​သည် အဘယ်သို့​သော အရာ​ဖြစ်​ဖြစ် “ဒါ​ဟာ ငါ့ကို ဘယ်​လို​အကျိုး​ရှိ​လာ​စေ​နိုင်​မ​လဲ၊ ငါ ဘယ်​လို​အမြတ်​ထွက်​မ​လဲ” အစ​ရှိ​သည်​ကို​သာ အရ​င်​စဉ်းစား​ပြီး ကိုယ်ကျိုး​မကို​က်​လျှင် လုံး​ဝ​မ​လုပ်…

လူ့​အဖွဲ့​အစည်း​၌ လူ​လူ​ခြင်း ကူညီ​ရိုင်းပင်း​ခြင်း၊ အနစ်​နာခံ​သင့်​လျှင် ခံ​ရ​ခြင်း အစ​ရှိ​သည်​များ​သည် လူ​မှန်​လျှင် မ​လွဲ​မ​သွေ လုပ်ဆောင်​အပ်​သော အမှု​ဖြစ်​သ​ဖြင့် ဤ​ကဲ့သို့ ကိုယ်ကျိုး​ကြည့်​လွန်း​ခြင်း ( The egocentric crank ) အမူအကျင့်​သည်၊ အရာ​ရာ​တွင် ငါ-ငါ-ငါ မည်​သော အတ္တ​ဘက်​များ​လွန်​ခြင်း​ကြောင့် မိတ်​သင်္ဂဟ အပေါင်းအသင်း​နည်းပါး​တတ်​သည်။

​၄) ညဉ်း​ညူ​လေ့ ညဉ်း​ညူ​ထ​ရှိ​သူ​များ( The Chronic Complainer )

အချို့​သော​သူ​များ​သည် နေအိမ်​၌​သော်​၎င်း၊ ရုံး​၌​သော်​၎င်း တ​ဆိပ်​ကို​တ​အိတ်​လုပ်​၍ အလွန်​ညဉ်း​ညူ​တတ်​၏။ ၎င်း​တို့​က “ကျုပ်​ရ​တဲ့​လခ​နဲ့ ကျုပ်​ပေး​ရ​မဲ့​လုပ်​အား​နဲ့​က မတန်​ဘူး။ လခ​က​နဲ့​နေ​တယ်၊ အလုပ်​က ဘယ်လောက်​ပင်ပန်း​တာ အထက်က အရာရှိ​က မ​ညှာတာ​ဘူး၊ ကျုပ်​က​ချည်း ဒိုင်ခံ​လုပ်​ပေး​ရ​တာ၊ ကျုပ်​အလုပ်​က သိပ်​မ​ကောင်း​ပါ​ဘူး​ဗျာ၊ နောင်​ရေး​လဲ​မ​ရှိ​ဘူး၊ လောလောဆယ်​လဲ အခွင့်အရေး​ဘာ​မှ မ​ရှိ​ဘူး” အစ​ရှိ​သည်​ဖြင့် ညဉ်း​ညူ​တတ်​ကြ​၏။

ထို့​ကြောင့် သင်​သည် သင်​၏ ပုဂ္ဂိုလ်​ရေး​ဆိုင်​ရာ​သိက္ခာ​မြင့်​တင်​လို​လျှင် မ​ညဉ်း​ညူ​ပါ​နှင့် သင်​၏​ညဉ်း​ညူ​နေ​မှု​သည် သင့်​အပြော​င်း​အသင်း​နှင့် ပတ်ဝန်းကျင်​ကို မ​ရွှင်မြူး​စေ​နိုင်၊ စိတ်​ဆင်းရဲ​ခြင်း​သာ ဖြစ်​စေ​နိုင်​သည်​ကို သတိပြု​ပါ။

အလုပ်​ကို​များ​များ​လုပ်​ပါ။ မ​ညဉ်း​ညူ​ပါ​နှင့်။ သင်​အလုပ်​များ​များ လုပ်​လေ၊ သင့်​အတွက် အခွင့်​အ​လမ်း​များ​သည် များ​သ​ထက်​များ​လာ​လေ ဖြစ်​သည်​ကို သတိထား​ပါ။

( ဆရာ​မောင်​မောင်​ကျော် ပြုစု​ပြန်ဆို​သော “သိ​ကောင်း​စရာ အိမ်ထောင်​မှု​သုခ” စာအုပ်​မှ ကူး​ယူ​ဖေါ်​ပြ​ခြင်း ဖြစ်​ပါ​သည်။ )