ဖန်တီး​ရှင် သုံး​ဦး

ဖန်တီး​ရှင် သုံး​ဦး
-------------------
ဘာသာ​ခြား​များ​က လောက​ကို ဖန်ဆင်း သူ​သည် ထာဝရဘုရား​သခင်​ဖြစ်​သည်​ဟု ဆို​သည်။ ဗုဒ္ဓ​ကတော့ မိမိ​သည်​သာ ဖန်ဆင်း​သူ​ဖြစ်​သည်။
ဗုဒ္ဓ​က – လူ့​ဘဝ​သည် အ​မွန်​မြတ်​ဆုံး ဖြစ်​ပေ​သည်။ လူ​သည် မိမိ​ကိုယ်​ပိုင် အရှင်​သခင်​ဖြစ်​၍ သူ​၏​ဘ၀​ဖြစ်​စဉ်​ကို စီရင်​ဆုံးဖြတ်​ရန် မည်​သည့်​တန်ခိုး အာဏာ​ရှင် သို့မဟုတ် အထက်​ပုဂ္ဂိုလ်​မျှ လို​အပ်​သည် မဟုတ်​ပေ။

“မိမိ​သည်​သာ​လျှင် မိမိ​၏ ကိုးကွယ်​ရာ ဖြစ်​၏။ မိမိ​မှ​တစ်ပါး အဘယ်သူ​သည် (မိမိ​၏) ကိုးကွယ်​ရာ ဖြစ်​နိုင်​ပါ​အံ့​နည်း”
ဟု မြတ်​ဘုရား​က မိန့်​ခဲ့​လေ​ပြီ။

၎င်း​၏ တပည့်​ရဟန်း​တို့​အား
“မိမိ​ကိုယ်​သာ အားကိုး​ကြ​လေ​တော့ အခြားတစ်ပါး​၌ ကိုးကွယ်​ရာ မ​ရှာ​လေ​နှင့်” ဟူ၍​လည်း ဩဝါဒ ပေး​ခဲ့​သေး​၏။

ဗုဒ္ဓ​ဘာသာ​ဝင်​တစ်​ဦးဦး​သည် အခြား​သူ တစ်​ဦးဦး​၏ ကျေးကျွန်​မဟုတ်။
ဗုဒ္ဓ​ဘာသာ​ဝင် တစ်​ဦး​ဖြစ်လာ​ရေး အတွက် မိမိ​၏ လွတ်လွတ်​လပ်​လပ် တွေးခေါ်​ဝေဖန် နိုင်​ခွင့်​ကို စွန့်​လွှတ်​စရာ မ​လို​အပ်​ပါ။
သူ​၏ လွတ်လပ်​ခွင့်​ကို ဆက်လက်​ကျင့်​သုံး နိုင်​သည့်​အပြင် သူ​ကိုယ်တိုင် ဘုရား​ဆု ပန်​ပြီး ပညာ​ပါရမီ​ဆက်လက်​တိုးတက် ဖြည့်​ဆည်း​ရေး အတွက်​ကို​သော်​မှ ဗုဒ္ဓ ဘာသာ​က အားပေး​ထောက်ခံ​ထား​ပါ​သည်။ အကြောင်း​မှု သမ္မာ​သ​မ္ဗု​ဒ္ဓ၊ ပစ္စေကဗုဒ္ဓ၊ သမ္မာ​ဗုဒ္ဓ၊ သုတ​ဗုဒ္ဓ ဟူ​သော ဗုဒ္ဓ​လေး​မျိုး အနက် တစ်​မျိုး​မျိုး​သော ဗုဒ္ဓ​ဖြစ်​နိုင်​သည့် ပင်ကိုယ်​စွမ်း​ရည်​များ ရှိ​နေ​သော​ကြောင့်​ပင် ဖြစ်​၏။

တခြား​ဘာသာ​နှင့် ဗုဒ္ဓ​ဘာသာ​ကွာ​ခြား ချက်​သည် တခြား​ဘာသာ​တို့​သည် ကိုးကွယ်​သူ​က ဘုရား​ဖြစ်​ချင်​လို့​မ​ရ​ဘူး။ ကျင့်​ရ​မယ့် ကျင့်​စဉ်​မ​ရှိ​ဘူး။ ဘယ်​ရွေ့​ဘယ်​မျှ​ကြာ​အောင် ကျင့်​ရ​မယ် ဆို​တဲ့ သတ်​မှတ်ချက်​မ​ရှိ​ဘူး။
ဗုဒ္ဓ​ဘာသာ​မှာ ကိုးကွယ်​သူ​က ဘုရား​ဖြစ်​ချင် လို့​ရ​တယ်။ ဘုရား​ဖြစ်​အောင် ကျင့်​ရ​မည့် ကျင့်​စဉ်​ရှိ​တယ်။ ဘယ်​ရွေ့​ဘယ်​မျှ​ကြာ​အောင် ကျင့်​ရ​မယ် ဆို​တဲ့ သတ်​မှတ်ချက်​လည်း​ရှိ​တယ်။

ဖန်တီး​ရှင်​သုံး​ဦး
------------------
သား​တို့ သမီး​တို့​စဉ်းစား​ပါ၊ အရမ်း​တော့ မ​ယုံ​စရာ။စာ​မေး​ပွဲ​အောင်​လို​က၊ စာ​ကြိုးစား လိုက်​ကြ၊ ဇွဲ​နဲ့​လုံ့လ​အရင်း​ခံ၊ ကြိုးစား​အချိန်​မှန်​မှန်၊
ထို​သူ​ဧကန်​ချမ်းသာ​ပွား၊ ပညာ​စီးပွား​ကောင်းကျိုး​များ၊
မ​ကြိုးစား​ဘဲ အ​ပျင်း​ထူ၊ ဆု​ပဲ​တောင်း​နေ​သူ၊
ကယ်မ​ည့်​သူ​ဘယ်​မ​ရှိ၊ သေချာ​ဒုက္ခရောက်​မည်​သိ၊
ကိုယ်၏​စွမ်းအား​ကိုယ်​ကိုး၊ သေချာ​ကြီးပွား​တိုးတက်​မှာ၊
ဗုဒ္ဓ​မြတ်​စွာ​ဟော​ညွှန်​ကြား၊ ကောင်းကျိုး​လိုလား​ကျင့်​စေ​သား၊
ကံ ဉာဏ် ဝီရိယ​စွမ်း​အင်​များ၊ ဖန်ဆင်း​ရှင်​လို့​မှတ်​စေ​သား။

ဒီ​ကဗျာ​တစ်​ပုဒ်​သည် မူလ​တန်း​စာအုပ်​မှ ကဗျာ​ဖြစ်​သော​လည်း ထို​ကဗျာ​ကြောင့် ဘာသာ​ခြား ဆရာ​မ​တစ်​ဦး​သည် ဗုဒ္ဓ​ဘာသာ ဝင်​တစ်​ယောက် ဖြစ်လာ​ခဲ့​ပါ​သည်။

ထို​ဖန်ဆင်း​ရှင် သုံး​ဦး​မှာ –
ကံ ဉာဏ် ဝီရိယ သာ​ဖြစ်​သည်။
ကံ ဆို​သည်မှာ အလုပ် စေတနာ။ ထို​ကံ​သည် အတိတ်​ကံ​ကြောင့် ယခု​ဘဝ​ခန္ဓာ​ကို လူ့​ဘဝ​တွင် ဖြစ်လာ​ရသ​ည်။ ထို​အတိတ်​ကံ​ကို​တော့ ပြင်​လို့​မ​ရ။ သို့​ပေ​မယ့် ပ​စ္စု​ပ္ပု​န်​ကံ​ကို ပြင်​နိုင်​သည်။
ဉာဏ် ဆို​သည်မှာ အကောင်း အ​ဆိုး အမှား အမှန် ပိုင်းခြား​သိ​ခြင်း​ကို ဆရာတော် ဦး​သု​မ​င်္ဂ​လ​က အ​ဓိ​ပ္ပါ​ယ်​ဖွင့်​ဆို​ပါ​သည်။
ဝီရိယ ဆို​သည်မှာ ကိုယ်​လိုချင်​တာ​တစ်​ခု​အတွက် အ​မြဲ​တစေ ကြိုးစား​အားထုတ်​မှု​ကို ဆို​လ်ို​ပါ​တယ်။

ဗုဒ္ဓ​က
ချို​သော မျိုးစေ့​ကို စိုက်ပျိုး​လျှင်
ချို​သော အသီး​ကို စား​ရ​မည်။
ခါး​သော မျိုးစေ့​ကို စိုက်ပျိုး​လျှင်
ခါး​သော အသီး​ကို စား​ရ​မည်။
ထို့​အတူ -
ကောင်း​သော​အမှု​ကို ပြု​လျှင်
ကောင်း​သော​အကျိုး​ကို ခံစား​ရ​မည်။
မ​ကောင်း​သော​အကျိုး​ကို ပြု​လျှင်
မ​ကောင်း​သော​အကျိုး​ကို ခံစား​ရ​မည်။

ကမ္မ​ဿ​က​တာ သမ္မာ​ဒိ​ဋ္ဌိ = ကံ​နှင့် ကံ​၏​အကျိုး​အပေါ် အမြင်​မှန်​ခြင်း၊
ကမ္မ​ဿ​က​တာ သမ္မာ​ဒိ​ဋ္ဌိ မ​ရှိ​သည်​နှင့် ထို​သူ​သည် ဗုဒ္ဓ​ဘာသာ​တစ်​ယောက် မဟုတ်​တော့​ပေ။

ကမ္မ​ဿ​က​တာ သမ္မာ​ဒိ​ဋ္ဌိ ဉာဏ်​ရင့်​သန်​ဖို့
------------------------------------------
စူ​ဠ​ကမ္မ​ဝိ​ဘ​င်္ဂ​သုတ်​မှာ ဗြဟ္မာ​ဘာသာ​ဝင် တော​ဒေ​ယျ​လို့​ခေါ်​တဲ့ ပုဂ္ဂိုလ်​က သူ​၏​သား သု​ဘ​လုင်​အား အလှူ​ဒါန လုပ်​လျှင် ကုန်​ခ​မ်း​မည်။ ထို့​ကြောင့် ဒါန မ​လုပ်​နှင့်​ဟု ဆုံးမ​၏။ ထို​တော​ဒေ​ယျ​သေ​တဲ့​အခါ တွေ​ဝေ​မှု​တွေ အားကြီး​ခဲ့​တာ​ကြောင့် သူ့​အိမ် မှာ​ပဲ ခွေး​ကြီး တစ်​ကောင်​လာ​ဖြစ်​တယ်။ ဖ​ခင်​ဘဝ​က​နေ​လာ​သော​ကြောင့် ဘဝ​နီး သ​ဖြင့် သု​ဘ​လုလင်​က ခွေး​ကြီး​ကို တ​အား ချစ်တယ် လို​လေ​သေး​မ​ရှိ​အောင်​ထား​တယ်။
ဘုရားရှင်​က သု​ဘ​လုလင်​ဟာ ခွေး​ကြီး​ကို အကြောင်းပြု​ပြီး ဗုဒ္ဓ​ဘာသာ​ဖြစ်​မှာ မြင်​တော် မူ​တဲ့​အတွက် တစ်​ရက်​မှာ သု​ဘ​ရဲ့ အိမ်​ကို ဆွမ်း​ခံ​ကြွ​သွား​တယ်။ အဲ​ဒီ​အချိန်​မှာ သု​ဘ​မ​ရှိ​ဘူး။ ခွေး​ကြီး​ကတော့ ဘုရားရှင် သူ​တို့​အိမ်​ရှေ့​လာ​တဲ့​နဲ့ သဲ​ကြီး​မဲကြီး ဟောင်​တော့​တာ​ပဲ။
ဗုဒ္ဓ​ဟာ တ​အား​ဟောင်​နေ​တဲ့ ခွေး​ကြီး​ကို လက်​ညျိုး​ထိုး​ပြီး “တော​ဒေ​ယျ သင်​ဟာ လူ့​ဘဝ​တုန်း​က ငါ​ဘုရား​နဲ့​ဆန့်ကျင်ဘက် လုပ်​ပြီး ဒါန​ကို​ပယ်​ခဲ့​တယ်။ အခု​ခွေး​ဘ၀​တောင်​ရောက်​နေ​ပြီး နောင်တ​မ​ရ​သေး​ရင် ခွေး​ဘဝ​က​သေ​ရင် ငရဲ​ထိ​ဆက်​ကျ​ဦး​မယ်” လို့​ပြော​ပြီး ဘုရားရှင်​က ကျောင်း​ကို ပြန်​ကြွ​သွား​တယ်။
တော​ဒေ​ယျ​ဟာ ခေါင်း​စိုက်​သွား​ပြီး ငါ​ခွေး​ဖြစ်​တာ​တောင် ဘုရားရှင်​တောင် သိ​တယ် ဆို​ပြီး ရှက်​စိတ် ဝမ်းနည်း စိတ်​ကြောင့် အိပ်​နေကျ ခုတင်​မှာ မ​အိပ်​ဘဲ ပြာ​ပုံ​ထဲ​တိုး​အိပ်​သွား​တယ်။
သု​ဘ​ပြန်လာ​တော့ ခွေး​ကြီး​ရဲ့​အခြေ​ပျက် နေ​တာ​တွေ့​တော့ အိမ်​စေ​တွေ​မေးမြန်း တော့​တယ်။
အဖြစ်​မှန်​ကို သိ​တော့ ဘုရားရှင်​ကျောင်း​ကို လိုက်​ပြီး ရန်တွေ့​တော့​တာ​ပဲ။ ကျွန်ုပ်​ဖ​ခင်​ခွေး​ဘ၀ ဖြစ်​တယ်​ဆို​ရင် သက်သေပြ​ပါ။ မ​ပြ​နိုင်​ရင် ဘုရား​ဖြစ်​ပြီး မုသားပြော​တယ်​ဆို​ပြီး တစ်​မြို့​လုံး ကြေငြာ မယ်။
ဗုဒ္ဓ​က... “အသင်​လုလင်၊ သင့်​ဖ​ခင်​မ​သေ​ခင် အပ်သွား​တဲ့​ပစ္စည်း​တွေ ရှိ​သလား။”

သု​ဘ​က “ရှိ​ပါ​တယ်။”

ဗုဒ္ဓ​က “ဒါ​ဆို​ရင် အိမ်​ပြန်​ရောက်​တဲ့​အခါ ခွေး​ကြီး​ကို ရေချိုး​ပေး​ပြီး ရေ​မ​ရော​တဲ့ နို့​ထမင်း​ကို ချက်​ကျွေး​ပါ။ ပြီး​နောက် နူးညံ့​တဲ့​အိပ်ရာ​ပေါ်​မှာ သိပ်ထား​ပြီး မ​နိုး​တ​နိုး​အချိန်​မှာ ကျော​သပ်​ပြီး အဖေ သား​ကို​မ​အပ်​ဘဲ ဝှက်ထား​ခဲ့​တဲ့​ဥစ္စာ​တွေ ဘယ်​နား​မှာ​လဲ​လို့ မေး​လိုက်​ပါ။”
ဒါ​နဲ့ သု​ဘ​က စဉ်းစား​တယ်။ တကယ်​လို့ ခွေး​ကြီး​ကို မေး​လို့ ဥစ္စာ​တွေ​ရှိ​တဲ့​နေရာ​တွင် ပြ​နိုင်​ရင် သူ့​အတွက်​အ​ရှူံး​မ​ရှိ။ တကယ်​လို့ မ​ပြ​နိုင်​ရင် ဘုရား​ကို မုသား​နဲ့​စွပ်စွဲ​ခွင့်​ရ​တယ် ဆို​ပြီး နှစ်​ဖက်​နှစ်​လှံ အ​ရှူံး​မ​ရှိ။ (အ​ရှူံး​မ​ရှိ​သော ဒ​ဿ​န ခေါင်းစဉ်​တွင် အကျ​ယ်​ဖတ်​နိုင်​သည်)
ဘုရားရှင်​ပြော​တဲ့​အတိုင်း တွေ့​ခဲ့​တဲ့ သု​ဘ​လုလင်​က မြတ်​စွာ​ဘုရား​ကို ကြည်ညို သွား​ပြီး နှစ်​အ​တော်​ကြာ သူ​သိ​ချင်​နေ​တဲ့ ပု​စ္တာ ​၁​၄​ချက်​ကို ဘုရားရှင်​အား သွား​မေး​တယ်။ မေးခွန်း​တွေ အဆုံး​မှာ သု​ဘ​လုလင်​ဟာ ဗုဒ္ဓ​ဘာသာ​ဝင်​ဖြစ်​သွား ခဲ့​ပါ​တယ်။

မေး – လူ​ချင်း​တူ​ပါ​လျက် တချို့​က အသက်​တို၊ တချို့​က​အသက်​ရှည် ကြ​ပါ​တယ်။
တန်ခိုး​ရှင် ဖန်ဆင်း​မျိုး​သာ မှန်​ရင် အသက်​ရှည်​သူ​တွေ​ကို​သာ ဖန်ဆင်း​သင့် ပါ​တယ်။
အသက်​တို​သူ​တွေ​ကို ဖန်ဆင်း​မ​သင့်​ပါ​ဘူး။ ဘာ​ကြောင့်​လဲ ဆို​တော့ မေတ္တာ ကရုဏာ ထား​တဲ့ ဘုရားရှင်​လို့ ခံယူ​ထား​လို့​ပါ​ပဲ။
ဖြေ – အသက်​ရှည်​တာ သူ့​အသက် မ​သတ်​ခဲ့​လို့။
အသက်​တို​တာ သူ့​အသက် သတ်​ခဲ့​လို့။

မေး – လူ​ချင်း​တူ​ပါ​လျက် တချို့​က ချမ်းသာ​တယ်။ တချို့​က ဆင်းရဲ​တယ်။ ဘာ​ကြောင့်​ပါ​လဲ။
ဖြေ - လူ​ချမ်းသာ ဖြစ်​ရ​တာ​သည် ဒါန​ပြု​ခဲ့​လို့။
လူ​ဆင်းရဲ ဖြစ်​ရ​တာ​သည် ဒါန​မ​ပြု​ခဲ့​လို့။

မေး – တချို့​လူ​တွေ​က အနာ​ရောဂါ များ​တယ်၊ တချို့​က​အနာ​ရောဂါ​နည်း​တယ်။
အဲ့​ဒါ ဘာ​ကြောင့်​ပါ​လဲ။
ဖြေ – အနာ​ရောဂါ​ကင်း​တာ သူတစ်ပါး​ကို မ​ညှင်း​ဆဲ​ခဲ့​လို့။
အနာ​ရောဂါ​များ​တာ သူတစ်ပါး​ကို ညှင်း​ဆဲ​ခဲ့​လို့။

မေး – လူ​ချင်း​တူ​ပါ​လျက် တချို့​က ရုပ်​ချော၊ တချို့​က ရုပ်​ဆိုး​တယ်။ ဘာ​ကြောင့်​ကွဲပြား​ရ​ပါ​သလဲ။
ဖြေ – ရုပ်​ချော​တာ မေတ္တာ​ပွား​ခဲ့​လို့။
ရုပ်​ဆိုး​တာ ဒေါ​သာ​အာဃာတ​ကြီး​ခဲ့​လို့။

မေး – လူ​ချင်း​တူ​ပါ​လျက် တချို့​က အခြွေအရံ​များ​တယ်၊ တချို့​က အခြွေအရံ​နည်း​တယ်။
ဘာ​ကြောင့်​ပါ​လဲ။
ဖြေ – အခြွေအရံ​များ​တာ ကိုယ်​ထက်​သာ​သူ​အပေါ် ဝမ်းမြောက်​ခဲ့​လို့။
အခြွေအရံ​နည်း​တာ ကိုယ့်​ထက်​သာ​သူ အပေါ် မ​နာလို​ခဲ့​လို့။

မေး – လူ​ချင်း​တူ​လျက် တချို့​အမျိုး​ယုတ်​တယ်။ တချို့ အမျိုး​မြတ်​တယ်။ ဘာ​ကြောင့်​ပါ​လဲ။
ဖြေ – အမျိုး​မြတ်​တာ မာန​ကင်း​ပြီး ဂါရဝ​နိဝါတ ရှိ​ခဲ့​လို့။
အမျိုး​ယုတ်​တာ မာနကြီး​ပြီး ဂါရဝ​နိဝါတ ကင်း​ခဲ့​လို့။

မေး – တချို့​က ​ဥာ​ဏ်​ကောင်း​တယ်။ တချို့​က ​ဥာ​ဏ်​ထိုင်း​တယ်။ ဘာ​ကြောင့်​ပါ​လဲ။
ဖြေ – ဥာ​ဏ်​ကောင်း​တာ ကိုယ်​မ​သိ​တာ မေးမြန်း​ခဲ့​လို့။
​ဥာ​ဏ်​မ​ကောင်း​တာ မေးမြန်း​ခြင်း​မ​ရှိ​ခဲ့​လို့။ ဟု မိန့်​ကြား​တော်​မူ​ခဲ့​ပါ​တယ်။

အ​ညွှန်း – အ​ရှူံး​မ​ရှိ​သော ဒ​ဿ​န၊ ဖန်ဆင်း​ရှင် သုံး​ဦး၊ အမေး​ဘာသာ​ခြား၊ အဖြေ​ဂေါတမ​ဘုရား။ လူ၊ သတ္တဝါ တို့​ကို ဖန်ဆင်း​ရှင်​က ဖန်ဆင်း​တာ​လား ဆို​တာ ကို သိ​ချင်​ရင်​တော့ “ဒေါက်​တာ​မင်း​တင်​မွန်​ရဲ့ ဘဝ​ဖန်တီး​ရှင် ကံ​တရား” စာအုပ်​တွင် ဖတ်​ရှု​နိုင်​ပါ​တယ်။

By-မေတ္တာ​ရိပ်